Kæru sýnendur,

hér koma nokkrir punktar sem gott er að hafa til viðmiðunar fyrir sýningar en listinn er þó alls ekki tæmandi.

Snyrting

Ø  Hjá þeim hundum sem hætt er við augnleka, þarf að byrja að hreinsa daglega undir augum a.m.k. 2 vikum fyrir sýningu með þar til gerðum efnum, t.d. Kleen Face

Ø  Gott að vera búin að klippa klær a.m.k viku f. sýningu.

Ø  Feldmikla hunda er best að baða daginn fyrir sýningu en aðra má baða aðeins seinna ef það hentar betur. (Panta þarf tímalega ef á að fara með hundinn á snyrtistofu).

Ø  Gott er að greiða feldinn áður en komið er á sýningarsvæðið.

Næring

Ø  Sumir gefa hundunum sínum ekki að borða áður en komið er með þá á sýningu, hafa kvöldmatinn t.d. í fyrra fallinu daginn fyrir sýningu. Það er gert til að draga úr áhættunni á slysum á sýningarsvæðinu og inni í hringnum og til að hafa þá sem áhugasamasta um það nammi sem við bjóðum upp á. Þetta á ekki við um hvolpa.

Ø  Vatn þurfa þeir að sjálfsögðu alltaf að hafa og takið með vatnsdall og vatn á sýninguna.

Snyrtilegur klæðnaður sem manni líður vel í, með eftirfarandi viðmiðunum

Ø  Helst ekki föt sem eru samlit hundinum sem verið er að sýna.

Ø  Ekki víðar flaxandi buxur.

Ø  Ekki stutt eða víð flaxandi pils.

Ø  Sléttbotna eða lághæla skór, alls ekki grófir.

Ø  Hundurinn er sýndur með sérstökum sýningartaumi sem fæst í flestum dýrabúðum, passið að fá fínlegan taum.

Áður en í hring er komið

Ø  Skrá hundinn inn klukkutíma fyrir áætlaðan sýningartíma. Komið hefur fyrir að dómarar séu á undan áætlun. Geyma hundinn bara úti í bíl á meðan.

Ø  Hreyfa hundinn vel og leyfa honum að losa sig utan dyra, hreinsa að sjálfsögðu upp eftir hundinn

Ø  Fara snemma inn með hunda sem þurfa langan tíma til að taka út svæðið, áður en þeir eru tilbúnir til að vinna með eiganda/sýnanda sínum

Ø  Fara eins seint og hægt er inn með hunda sem eru fljótir að láta sér leiðast aðstæður, muna að fylgjast vel með hvenær röðin kemur að ykkar tegund og hvenær byrjað er að raða upp.

Ø  Hringverðir raða sýnendum upp eftir númerum sem fást við skráningu, best er að halda röðinni, þar til hringstjóri gefur bendingu hvenær sýnandi á að fara inn í hringinn og dómari gefur skipun um hvað gera skal. Hringstjóri aðstoðar sýnendur við að skilja dómara, ef þörf er á.

Í hringnum

Ø  Vera með góða skapið og æðruleysi.

Ø  Nammi og/dót til að vekja áhuga hundsins (nammi sem festist ekki í tönnum hundsins og hann er fljótur að borða).

Ø  Skítapoka til að þrífa upp óhöpp sem gera ekki boð á undan sér.

Ø  Passa að fara ekki á milli hunds og dómara.

Ø  Reyna að stilla hundi ávallt þannig upp að dómari sjá vel hundinn og þurfi ekki að færa sig til að dæma hundinn.

Ø  Nýtið ykkur eðlislæga forvitni Chihuahua, þeir þurfa ekki sífellt að vera að horfa á sýnanda sinn. Passa bara að þeir gangi reistir og séu ekki með nefið niðri.

Ø  Chihuahua á að stilla sér upp sjálfur, þ.e. sýnandi fer ekki niður og stillir honum upp, heldur lætur hundinn standa frjálsan á gólfinu á meðan dómari dæmir. Þjálfa þarf hundinn í því að standa "fallega" og reistan fyrir framan dómarann. (Ef hundur vill ekki standa fallega, t.d. setur skottið niður eða krippu á bakið, verður sýnandi að aðstoða hann með því að stilla honum upp).

Ø  Misjafnt er hvort byrjað er á því að ganga einn hring og síðan farið upp á borð, þegar inn í hring er komið.

Ø  Oftast eftir að skoðun hefur farið fram á borðinu, er hundur látinn fara fram og til baka og/eða þríhyrning, síðan látinn stilla sér upp fyrir framan dómaraborðið á meðan dómari lætur dómritara rita dóm hundsins.

Ø  Síðan afhendir hringstjóri þann borða sem dómari dæmir hundinum, rautt fyrir I. einkunn, blátt fyrir II. einkunn og gult fyrir III. einkunn. Ef hundur fær II. eða III. einkunn hefur hann lokið keppni og má yfirgefa hringinn. Þeir aftur á móti sem fá I. einkunn, bíða í hringnum á meðan dómari dæmir aðra hunda í sama flokki.

Ø  Hringverðir segja þeim svo til sem hafa fengið framhaldseinkunn og eiga að mæta aftur í hring.

Ø  ALDREI SKAMMA HUND HARKALEGA.

Allt starfsfólk sýningar er tilbúið til að aðstoða sýnendur og ekki hika við að leita til þeirra. Dómara má aftur á móti ekki ræða við, að öðru leyti en því að svara spurningum þeirra.

Dómarar gætu spurt um aldur hundsins. Að vísu getur verið gott að benda dómara á ef tík er á lóðaríi, það er sjálfsögð kurteisi að vara þá við ef tíkin er að blæða.

Aðeins sýnendur mega vera þeim megin sem hundar fara inn í hringinn, aðrir sem vilja fylgja hundinum verða að vera á áhorfendapallinum.

Þeir aftur á móti sem sýna fleiri en einn hund, þurfa að hafa aðstoðarmanneskju með sér og gera ráðstafanir ef hundar lenda saman í hring.

Reynum að hafa hugann við hundinn okkar, pössum að aðrir hundar séu ekki að ónáða hann og að hann sé ekki að ónáða aðra hunda eða skíta út svæðið. Njótum þess að eiga þessa stund með hundinum okkar, hann hefur gaman af því að vinna með okkur þegar við erum jákvæð.

Og munum að við eigum öll besta og flottasta hundinn fyrir okkur, óháð því hvar dómari telur hann vera samkvæmt standard.

Þeir sem eru að sýna hvolpa, takið þessu sem æfingu og hlæjið að því sem út af ber. Þið eruð með litla fjörkálfa sem geta tekið upp á því að neita að ganga og hvað með það... Dómarar hafa almennt mikla þolinmæði fyrir hvolpum og gera litlar kröfur til þeirra, flestir hafa húmor fyrir ærslagangi hvolpa og vilja frekar sjá glaða hvolpa sem ekki gera allt eins og á að gera en að sjá óörugga hvolpa sem standa og labba eins og sýnendur vilja.

Af hverju að taka þátt í sýningum?

Fyrir utan að njóta þess að vinna verkefni með hundinum sínum, þá eru sýningar nauðsynlegar fyrir þá sem hafa hug á að rækta. Aldrei ætti að rækta undan dýrum sem ekki hafa fengið góða dóma eftir hvolpaflokk frá fleirum en einum dómara. Hvolpasýningar eru æfingar fyrir alvöru sýningar.

Í ræktun þarf ætíð að hugsa út frá heildarmyndinni og reyna þannig að stuðla að betri stofni tegundarinnar.

Einnig ætti aldrei að rækta undan dýrum sem eru með afgerandi galla í t.d. biti, geðslagi (hræddir/grimmir/taugaveiklaðir) svo dæmi séu tekin.

Á sýningum HRFÍ eru aðeins viðurkenndir dómarar af FCI og því getum við treyst á að fagmennska sé höfð að leiðarljósi.

Aldrei para dýrin ykkar við dýr sem ekki eru með viðurkenndar ættbækur af FCI og munum að HRFÍ er eina félagið á Íslandi sem gefur út viðkenndar ættbækur af FCI. Það er að sama skapi jafn alvarlegt  að para við dýr sem hafa enga ættbók eða eru af annarri tegund.

Ef við stöndum saman í ræktun, þá eigum við meiri möguleika á að rækta upp heilbrigðan stofn sem við getum verð stolt af gagnvart öðrum Chihuahua ræktendum í heiminum.

Ofangreindar upplýsingar eru teknar saman af undirritaðri.

Með þökk fyrir frábæra samvinnu og sameiginlegan áhuga á þessari einstöku tegund,

Halldóra Reykdal